టాలీవుడ్ ఎంట్రీకి సిద్ధమైన చహల్ మాజీ భార్య ధనశ్రీ వర్మ

ప్రముఖ భారత క్రికెటర్ యుజ్వేంద్ర చహల్ మాజీ భార్య, డ్యాన్సర్, కొరియోగ్రాఫర్, నటి ధనశ్రీ వర్మ ఇప్పుడు దక్షిణాది సినీ పరిశ్రమ, ముఖ్యంగా టాలీవుడ్‌లో తన అదృష్టాన్ని పరీక్షించుకోవడానికి సిద్ధమయ్యారు. 'ఆకాశం దాటి వస్తావా' అనే తెలుగు చిత్రంతో ఆమె వెండితెర అరంగేట్రం చేయనున్నారు. తన బహుముఖ ప్రతిభతో 'టింగ్ లింగ్ సజనా' వంటి పలు విజయవంతమైన మ్యూజిక్ వీడియోలలో మెరిసిన ధనశ్రీ, నటనను కూడా తన కెరీర్‌లో భాగంగా చేసుకుంటున్నారు.

ఇటీవల ఒక ప్రముఖ ఆంగ్ల మీడియాకు ఇచ్చిన ఇంటర్వ్యూలో ధనశ్రీ తన కెరీర్, వ్యక్తిగత జీవితంపై వస్తున్న వదంతుల గురించి స్పందించారు. "నా వ్యక్తిగత జీవితంపై వస్తున్న ఊహాగానాలను నేను ఏమాత్రం పట్టించుకోను. నా చుట్టూ ప్రచారంలో ఉన్న కథనాలకు, వాస్తవానికి ఎలాంటి సంబంధం లేదు. నా విలువలు, పెంపకం నాకు తెలుసు. గౌరవం, హుందాతనాన్ని కాపాడుకోవడమే నా నైజం," అని ఆమె స్పష్టం చేశారు.

ప్రస్తుతం తన దృష్టి అంతా కెరీర్‌పైనే ఉందని, పనిలోనే తనకు సంతృప్తి, ఎదుగుదల లభిస్తాయని ధనశ్రీ ఉద్ఘాటించారు. "డ్యాన్స్, నటన, గానం, కొత్త సంగీతాన్ని సృష్టించడం వంటి సృజనాత్మక పనులే నాకు అండగా నిలిచాయి. షూటింగ్‌లతో బిజీగా ఉన్నాను, ఉత్తేజకరమైన పాటలపై పనిచేస్తున్నాను. ఖాళీగా కూర్చోవడానికి సమయం లేదు. ఈ మార్పులు మంచి కోసమే జరిగాయి," అని ఆమె తెలిపారు.

ప్రేమ, వివాహం గురించి మాట్లాడుతూ, "ప్రస్తుతానికి నా ప్రపంచం కెరీరే. పెద్ద, మంచి ప్రాజెక్టులు చేయడం, ప్రజలను సానుకూలంగా ఉత్తేజపరిచేలా వినోదాన్ని అందించడంపైనే నా దృష్టి ఉంది. ప్రేమ అనేది మనం ప్లాన్ చేసుకుంటే వచ్చేది కాదు. నా తలరాతలో మంచి రాసి ఉంటే, తప్పకుండా జరుగుతుంది. కానీ ఇప్పుడైతే నా సర్వశక్తులూ నా కెరీర్‌కే అంకితం," అని ధనశ్రీ వర్మ వివరించారు. బాలీవుడ్‌తో పాటు టాలీవుడ్‌లో కూడా పలు ఆసక్తికర ప్రాజెక్టులతో బిజీగా ఉన్న ఈ యువ ప్రతిభాశాలి, తెలుగు ప్రేక్షకులను ఏమేరకు మెప్పిస్తారో చూడాలి.